بۇل تۋرالى مەملەكەت باسشىسى قاسىم-جومارت توقاەۆ ورتالىق ازيا مەملەكەتتەرى باسشىلارىنىڭ V كونسۋلتاتيۆتىك كەزدەسۋى بارىسىندا ايتتى, دەپ حابارلايدى Egemen.kz اقوردانىڭ ءباسپاسوز قىزمەتىنە سىلتەمە جاساپ.
«مادەني-گۋمانيتارلىق ىنتىماقتاستىق ءبىزدىڭ كوپجاقتى بايلانىستارىمىزدى تەرەڭدەتۋگە ۇلكەن سەپتىگىن تيگىزەدى. بۇل ماڭىزدى سالا جىلدان-جىلعا ساپالى ءارى جاڭا مازمۇنمەن تولىعىپ, ءبىزدىڭ عاسىرلار بويى جالعاسىپ كەلە جاتقان داستۇرلەرىمىزدى, دوستىعىمىز بەن تاتۋ كورشىلىگىمىزدى نىعايتا تۇسەدى. مۇنىڭ ءبارى مەملەكەتتەرىمىزدىڭ ءوزارا تابىستى قارىم-قاتىناسىنا جانە جالپىوڭىرلىك وزەكتى مىندەتتەردىڭ ءتيىمدى شەشىلۋىنە ىقپال ەتەدى», دەدى پرەزيدەنت.
سونداي-اق قاسىم-جومارت توقاەۆ قازاقستان ورتالىق ازياداعى بارلىق ەلمەن اراداعى كوپجاقتى ىنتىماقتاستىقتى كەڭ كولەمدە نىعايتۋعا باعىتتالعان ستراتەگيالىق باعداردى بەرىك ۇستاناتىنىن اتاپ ءوتتى.
«ورتاق ءىس-ارەكەتتەر سينەرگياسى مەن ءوزارا قولداۋ باۋىرلاس حالىقتارىمىزدىڭ وركەندەۋىنە جانە ءال-اۋقاتىنىڭ ارتۋىنا جول اشاتىنىنا سەنىمدىمىن», دەدى مەملەكەت باسشىسى.